Calandreta Cardonilha

LA CARDONILHA

La Calandreta de Mèsa deu son nom a l’obstinacion d’una cardonilha (chardonneret) qu’aviá decidit de far de l’escòla son ostal. L’escòla Calandreta la Cardonilha foguèt creada per Anna Milhau.

En 1996,  la primièra classa de PS2 e MS dobrís amb una desena de mainatges dins un local situat « quai Descornut ». La cort de recreacion se trapava al bolodròme d’a costat.

En 1997,  l’escòla muda dins l’anciana gardariá prèp de la plaja e en 1998 una segonda classa bastida pels parents dobrís.

En 2000,  una tresena classa dobrís dins lo pòst d’assisténcia de la plaja.

En 2001,  la primièra part de l’escòla d’ara comença. Serà seguida l’annada d’aprèp per la construccion de doas classas suplementàrias e d’un pati cobèrt. La darrièra part s’acaba en 2005.

En 2006,  a la seguida d’un incendi, la partida prefabricada de l’escòla es tornar bastida en dur.

En 2008,  l’escòla comptava 85 enfants de la pichòta seccion (PS) de mairala cap al CM2. La còla pedagogica es alara constituida de quatre regents e mai un mièg-pòst de regent de francés.

L’annada 2010 es marcada per la dobertura d’una cinquena classa. Los efectius passan alara a 120 mainatges e la còla pedagogica en plaça gausís d’un renfòrt pedagogic.

En 2014,  l’escòla es compausada d’una centena d’escolans.

En 2018,  l’escòla s’espandís amb la construccion d’una extencion. Las classas son mai grandas e mai plan equipadas per aculhir los mainatges.  

LA PEDAGOGIA

Calandreta a per tòca d’installar las condicions d’un bilingüisme vertadièr en trasmetre l’occitan còsta del francés. Calandreta desvolopa tanben una pedagogia activa, dicha institucionala. 

Lo BILINGÜISME/ L’IMMERSION LINGÜISTICA : Calandreta es una escòla qu’utiliza lo metòde d’imersion lingüistica tre la mairala. L’occitan es la lenga ensenhaira e ensenhada. Lo bilingüisme dobrís tanben de perspectivas de plurilingüisme. L’enfant qu’aquesís una segonda lenga, melhora sa primièra lenga e pòt aisidament n’aprene d’autras.

L’AFECCION D’UNA CULTURA E UNA DOBERTURA SUL MOND :
Lo bilingüisme marca l’afeccion a una cultura e a un territòri. Es tanben una dobertura sul monde e los autres.

Favoriza mai que mai l’aprendissatge de las lengas estrangièras, que la coneissença a l’ora d’ara es una necessitat.
Amai de l’aquisicion d’una segonda lenga, e los profièches practics qu’aquò conferís, l’educacion bilingüa dona sus una vertadiera dobertura pluriculturala, sus la practica de l’interculturalitat e sus una lectura dobla del monde e de la realitat. Lo bilingüisme dobrís tanben de perspectivas de plurilingüisme.
La cultura occitana es al centre dels ensenhaments e dona de sens als aprendissatges.

UNA PEDAGOGIA ACTIVA

Calandreta s’inscriu dins lo sistèma pedagogic soscat per Célestin Freinet e la pedagogia institucionala. Respècte mutual e enveja d’aprene son la basa de l’ensenhament. Calandreta aplica de metòdes de pedagogia activa qu’an per tòca de donar la paraula a l’enfant, a lo rendre autonòm, a èsser actor de la vida del grop e de sos aprendissatges, a regular la vida del grop en utilizant diferentas institucions coma lo « conselh », lo « qué de nòu ? » … e las cenchas d’avaloracion.

Calandreta es un ensemble d’associacions autogeridas que vivon la participacion dels parents a cada nivèl. Acompanhan lo desvolopament de l’escòla e s’assòcian als regents per menar de projèctes de l’escòla.

L’implicacion de cada familha es necessària al bon foncionament de l’escòla.

UN FONCIONAMENT ASSOCIATIU
L’associacion, que cada parent aderís, es fisadoira del projècte e jòga un ròtle de gestion per fin d’assegurar amb los regents lo bon foncionament de l’escòla.

Coma cada associacion de tipe lei 1901, la Calandreta de Mèsa es gerida per una Amassada génerala (AG) e administrada per un conselh d’administracion (CA) elegit dins son sen. Un burèu es tanben eissit del Conselh d’Administracion.

 

ACTUALITÉS DE L'ÉCOLE & ÉVÉNEMENTS DE L'ASSOCIATION